Əmək və Əhalinin Sosial Müdafiəsi Nazirliyi (ƏƏSMN) Bakının Ramana və Ümid qəsəbələrində, Abşeron və Samux rayonlarındakı yeni yaşayış binalarında 1 080 mənzili ms.sosial.gov.az portalı üzərindən təkrar onlayn satışa çıxarıb.
Gencexeber.az-ın məlumatına görə, Samuxda inşa edilən yeni yaşayış binaları rayonun Seyidlər kəndinin tam yaxınlığında, Gəncə şəhərindən təxminən 15 kilometr məsafədə yerləşir. Orada mənzillər 3 və 4 otaqlıdır, tam təmirlidir, istifadə olunmayıb və çıxarışlıdır.
Qeyd edək ki, kompleks doqquz dördmərtəbəli iki bloklu binadan ibarətdir. Hər mərtəbədə 2 və ya 3 mənzil yerləşir. 3 otaqlı mənzillərin sahəsi 79,8–80,5 m², 4 otaqlıların isə 100,5 m² təşkil edir.
Bütün mənzillər müasir tələblərə uyğun kombi isitmə sistemi ilə təmin olunub.
Ərazidə geniş və yaşıllıqlarla əhatəli həyətlər, söhbətgahlar, yerüstü dayanacaq yerləri, həmçinin 50 uşağın təlim-tərbiyəsi üçün uşaq bağçası var. Bundan başqa, binaların həyətində uşaq meydançaları salınıb.
Sakinlərin sosial tələbatını qarşılamaq məqsədilə 140 şagirdlik orta məktəb, inzibati bina və klub-icma mərkəzi də layihəyə daxildir.
