Uzun illər Gəncə təhsilinə xidmət etmiş əməkdar müəllim Müsəddin Məmmədovun 100 illiyi münasibətilə anım tədbiri keçirilib.
Gencexeber.az-ın məlumatına görə, tədbir ilk olaraq onun uzun illər direktor vəzifəsində çalışdığı İsmət Qayıbov adına 1 nömrəli tam orta məktəbdə baş tutub. Görüşdə mərhum pedaqoqun yaxınları, vaxtilə onunla birgə çalışmış, hazırda təqaüddə olan müəllimlər, həmçinin məktəbin indiki pedaqoji kollektivi iştirak ediblər.
Çıxışlarda Müsəddin Məmmədovun təhsil sahəsindəki xidmətləri, məktəbə rəhbərlik etdiyi illərdə gördüyü işlər və pedaqoji fəaliyyəti xüsusi vurğulanıb. Bildirilib ki, o, yalnız rəhbər kimi deyil, həm də yüksək mənəvi keyfiyyətlərə malik müəllim kimi yadda qalıb.
Daha sonra iştirakçılar Gəncə şəhərinin Fəxri Xiyabanında mərhumun məzarını ziyarət ediblər. Məzarı üzərinə gül dəstələri və əklillər qoyulub, ruhuna dualar oxunub.
Məktəbin direktoru Tutu Hüseynova çıxış edərək Müsəddin Məmmədovun şərəfli ömür yolundan bəhs edib, onun Gəncə təhsilində qoyduğu izdən danışıb.
Mərhumun övladları isə tədbirin təşkilinə və xoş sözlərə görə müəllim kollektivinə təşəkkürlərini bildiriblər. Onlar qeyd ediblər ki, Müsəddin Məmmədov kimi bir atanın övladları olmaq onlar üçün böyük qürur mənbəyidir. İllər keçsə də, onun Azərbaycan təhsilinə verdiyi töhfələr unudulmur və adı hər zaman dərin hörmətlə anılır.
Qeyd edək ki, Müsəddin Məmmədov Azərbaycan təhsilinin inkişafındakı xidmətlərinə görə Prezident cənab İlham Əliyevin 31 may 2007-ci il tarixli Sərəncamı ilə Azərbaycan Respublikası Prezidentinin fərdi təqaüdünə layiq görülüb.
