Xəbər verdiyimiz kimi, dünən, mayın 25-də Gəncədə "Dubay" bazarının yaxınlığında, Tağı Arani küçəsində yolun çökməsi nəticəsində yol-nəqliyyat hadisəsi baş verib. Çökəkliklərdən birinə iritonnajlı yük avtomobili düşüb.
Gencexeber.az-a Gəncə şəhər Sukanal İdarəsindən verilən məlumata görə, Azərbaycan Bayrağı (Taği Arani) küçəsində 25 may 2026-ci il tarixində tırın çökəkliyə düşməsi tamamən sürücünün səhlənkarlığından baş verib.
"Qeyd etmək istəyirik ki, 24 may 2026-ci il tarixində 1000 mm-lik kanalizasiya xəttində yaranmış tutqunluğun aradan qaldırılması istiqamətində Gəncə şəhər Sukanal İdarəsinin Qəza-bərpa xidməti tərəfindən yolun çökmüş hissəsi qazılaraq bərpa edilib, tam olaraq qazılan ərazinin üstü örtülüb.
Əlavə olaraq qazılmış hissə təhlükəsizlik çəpərləri və xəbəredici nişanlarla əhatə olunub", – Gəncə şəhər Sukanal İdarəsi bildirib.
Qeyd edək ki, sözügedən ərazidə qısa müddətli yağışdan sonra küçə su altında qalıb, kanalizasiya sistemi isə daşıb.
