Yeni Gəncə qəsəbəsində yerləşən 16 saylı binanın sakinləri yaşadıqları doqquzmərtəbəli binanın vəziyyətindən narazıdırlar.
Gencexeber.az-a daxil olan çoxsaylı şikayətlərə görə, binada mütəmadi olaraq su və kanalizasiya borularının partlaması halları baş verir. Nəticədə mərtəbəarası meydançaları su basır, bloklarda gölməçələr yaranır. Beton hissələr isə suyun təsirindən aşınaraq tədricən tökülməyə başlayır.
Sakinlərin sözlərinə görə, xüsusilə binanın giriş hissələrindəki beton qatlar artıq ciddi şəkildə zədələnib. Onlar bildirirlər ki, vaxtında tədbir görülməzsə, bu vəziyyət insanların təhlükəsizliyi üçün risk yarada bilər.
Bundan başqa, sakinlər tikilinin ətrafında antisanitar vəziyyətin hökm sürdüyünü də qeyd edirlər. Onların sözlərinə görə, əraziyə müxtəlif tullantılar atılır və bu da yaşayış şəraitini daha da çətinləşdirir.
Şikayətçilər aidiyyəti qurumlardan binanın vəziyyətinə nəzarətin gücləndirilməsini, giriş hissələrinin təmir olunmasını və yaranmış problemlərin aradan qaldırılmasını xahiş edirlər.
