Gəncə şəhərinin Cavad Rəfibəyli küçəsi, 2 ünvanında yaşayan sakinlər ciddi problemlə üz-üzə qalıblar. Söhbət mövcud asfalt örtüyünün qazılaraq su və kanalizasiya xəttinin çəkilməsindən, lakin işlər yekunlaşdıqdan sonra asfaltın bərpa olunmamasından gedir.
Gencexeber.az-a sakinlər tərəfindən bildirilib ki, bir müddət öncə ərazidə su və kanalizasiya xətləri tamamilə yenilənib. Qazıntı işləri aparılarkən vətəndaşlara asfalt örtüyünün bərpa ediləcəyi vəd edilib. Lakin bu, yalnız sözdə qalıb.
Məlumata əsasən, su və kanalizasiya xətlərinin çəkilişi başa çatıb, sayğaclar quraşdırılıb, amma asfalt örtüyü vurulmayıb. Cavad Rəfibəyli küçəsi, 2 ünvanında təxminən 20-yə yaxın ailə yaşayır və hazırda yaşayış massivi faktiki olaraq keçilməz vəziyyətə düşüb.
Yağan yağışlardan sonra küçədə dərin gölməçələr, qalın palçıq təbəqəsi yaranıb. Nəticədə nə piyada, nə də avtomobillərin hərəkəti mümkün olur. Sakinlər gündəlik həyatlarını böyük çətinliklə davam etdirdiklərini bildirirlər.
Ən acınacaqlı məqam isə yaranmış vəziyyətin aradan qaldırılması istiqamətində heç bir real tədbirin görülməməsidir. İşi həyata keçirən podratçı şirkət, eləcə də aidiyyəti qurumlar problemin həlli üçün hər hansı addım atmır. Sanki bu vəziyyətlə barışmaq sakinlər üçün məcburi hesab olunur.
Nəticədə bütün əziyyəti sadə vətəndaşlar çəkir, verilən vədlər isə boş söz olaraq qalır.
