Yeni Gəncə qəsəbəsində yerləşən Dövlət Sosial Müdafiə Fondunun (DSMF) yerli filialında bu gün də böyük izdiham müşahidə olunur.
Gencexeber.az-a daxil olan çoxsaylı şikayətlərə görə, buna səbəb 3 Dekabr – Beynəlxalq Əlilliyi Olan Şəxslər Günü münasibətilə Sosial Xidmətlər Agentliyi tərəfindən ayrılan 30 manatlıq maddi yardımın verilməsidir.
Vətəndaşların sözlərinə əsasən, yardımın noyabrın 1-dən 20-nə kimi ödəniləcəyi bildirilsə də, prosesin ləngiməsi onların günlərlə növbələrdə qalmasına səbəb olub. Bir çoxu gün ərzində dəfələrlə filialın qarşısına gəldiklərini, hətta bir neçə avtobus dəyişdiklərini, lakin buna baxmayaraq pulu ala bilmədiklərini deyir.
2-ci qrup əlilliyi olan bir izləyicimiz bildirib ki, dünən səhər saatlarından gözləmələrinə baxmayaraq, maddi yardımı əldə etmək mümkün olmayıb:
"Səhər saat 7-dən gələn var. Çoxları pulu ala bilmədən qayıdır. 2-ci qrup əliləm 30 manata görə bizi süründürürlər. Çox adam kimi biz də ala bilmədik. İstəmirik belə əziyyət çəkək. Vermək istəyən karta köçürər."
Vətəndaşlar problemin qısa zamanda həll edilməsini, maddi yardımın ədalətli və şəffaf şəkildə paylanmasını tələb edirlər.
