Gəncə şəhərində uşu üzrə Vətən müharibəsi şəhidlərinin xatirəsinə həsr olunan uşaq, yeniyetmə və gənclər arasında açıq "Zəfər Kuboku" turniri təşkil edilib.
Gencexeber.az-ın məlumatına görə, yarış Gəncə Olimpiya İdman Kompleksində baş tutub və rekord sayda iştirakçı ilə yadda qalıb. Gəncə, Bakı, Samux, Göyçay, Şəki, İsmayıllı, Kəlbəcər, Bərdə, Gədəbəy və Ağstafanı təmsil edən 30 komanda və 250-yə yaxın idmançı turnirə qatılıb. Onlar həm ustalıqlarını nümayiş etdirib, həm də şəhidlərimizin müqəddəs xatirəsinə idman meydanında ehtiramlarını ifadə ediblər. Gün ərzində yüzlərlə qarşılaşma baş tutub.
Gəncə idmançıları turnirdə yüksək nəticə göstərərək, ümumi komanda hesabında I yerə layiq görülüblər. Paytaxt komandası Bakı – II yer, Göyçay komandası isə III yerə layiq görülüb.
Turnirdə xüsusi olaraq Azərbaycan Uşu Federasiyasının rəhbər şəxsləri iştirak ediblər – Baş hakim Rəşad İsayev, Gənclərdən ibarət yığma komandanın baş məşqçisi, 6 qat Avropa çempionu, Prezident mükafatçısı, VI İslam Həmrəyliyi Oyunlarının bürünc mükafatçısı Elçin Eminov, Yarışın Baş katibi (Beynəlxalq dərəcəli hakim, Qərb bölgəsi üzrə sədr müavini) Fəxri Namazlı.
Bundan əlavə, ADFA Qərb bölgəsinin sədri, Fəxri Bədən Tərbiyəsi və İdman İşçisi, Əməkdar məşqçi İlqar Alıyev, Gəncə–Daşkəsən Regional Gənclər və İdman İdarəsinin rəisi Elvin Quliyev, şəhid ailələrinin üzvləri, dünya və Avropa səviyyəli idmançılar da tədbirdə iştirak ediblər.
