Bakıda Sərhədçi Olimpiya İdman Kompleksində pankration və grappling üzrə ölkə birinciliyi keçirilib.
Gencexeber.az-ın məlumatına görə, Azərbaycan MMA və Grappling Federasiyasının təşkilatçılığı ilə keçirilən yarışda Gəncə şəhərini təmsil edən idmançılar iştirak edərək yüksək nəticələr əldə ediblər.
Pankration yarışlarında məşqçi Cavidan Cəfərovun yetirməsi Ədalət Abbasov (10-11 yaş, 50 kq) bütün rəqiblərinə qalib gələrək çempion olub. Kamran Həsənov (16-17 yaş, 85 kq) və Fərid Zeynallı (12-13 yaş, 55 kq) fəxri kürsünün ikinci pilləsinə yüksəliblər.
Ayxan Babayev (12-13 yaş, 50 kq), Suliddin Mirzəyev (12-13 yaş, 50 kq), Turan Məmmədov (12-13 yaş, 55 kq) və Eldar Novruzlu (14-15 yaş, 100 kq) isə yarışı üçüncü yerdə başa vuraraq bürünc medal qazanıblar.
Məşqçi Səbuhi Məmmədovun grappling yarışlarında mübarizə aparan tələbəsi Şahin Yaqubov (16-17 yaş, 86 kq) da uğurlu çıxış edərək ikinci yerə layiq görülüb.
Qeyd edək ki, yarışın hakimlər korpusunda Gəncə şəhərini təmsil edən Seymur Layıcov, Xəyal Əmrahov və Əjdər Alıyev yer alıblar.
