Gəncəli idmançılar beynəlxalq arenada uğur qazanıblar.
Gencexeber.az məlumat verir ki, 2011-ci il təvəllüdlü sərbəst güləşçi Tunar Həsənov Bolqarıstanın Samokov şəhərində güləş üzrə keçirilən U-17 Avropa çempionatında bürünc medal əldə edib. 45 kiloqram çəki dərəcəsində çıxış edən idmançı medal uğrunda görüşdə Türkiyə təmsilçisi Buğra Eldəmiri 5:2 hesabı ilə məğlub edərək fəxri kürsüyə yüksəlib.
Digər uğura isə Gəncədə fəaliyyət göstərən Kəlbəcər rayon 11 nömrəli tam orta məktəbin şagirdi, 2013-cü il təvəllüdlü Turan Şahid oğlu Abdullazadə imza atıb. Yeniyetmə əlcək ustası Türkiyənin Antalya şəhərində keçirilən "Turkish Open WAKO World Cup" turnirində uğurlu çıxış edib.
Dünya Kikboksinq Təşkilatları Assosiasiyasının (WAKO) təşkilatçılığı ilə baş tutan yarışda Turan Abdullazadə 47 kiloqram çəki dərəcəsində "kick light" versiyası üzrə mübarizə aparıb. 46 ölkənin nümayəndələrinin iştirak etdiyi turnirdə III yerə layiq görülən idmançı bürünc medal qazanıb.
