Dünya Azərbaycanlılarının Həmrəylik Günü və Yeni ilin gəlişi münasibətilə Gəncə Şəhər İcra Hakimiyyəti tərəfindən hər hansı rəsmi tədbirin keçirilməsi nəzərdə tutulmur.
Bu barədə Gencexeber.az-a adıçəkilən qurumun İctimai-siyasi və humanitar məsələlər şöbəsindən məlumat verilib. Bildirilib ki, qurum tərəfindən konsert proqramının təşkili, eləcə də digər kütləvi tədbirlərin keçirilməsi planlaşdırılmayıb.
Buna baxmayaraq, şəhərin mərkəzi meydanında Yeni ilin simvolu hesab edilən küknar ağacı quraşdırılıb. Bakı Abadlıq Xidməti və Gəncə şəhər Mənzil Kommunal Təsərrüfatı İstehsalat Birliyinin əməkdaşları tərəfindən hündürlüyü təxminən 10 metr olan yolka ucaldılıb. Eyni zamanda Gəncənin bir sıra prospekt və küçələri rəngli işıqlar və dekorativ fiqurlarla bəzədilib.
Qeyd edək ki, ötən il – dekabrın 31-də də şəhər rəhbərliyi tərəfindən atəşfəşanlıq və konsert proqramı təşkil olunmayıb. Şəhər meydanına toplaşan sakinlər Yeni ili özləri gətirdikləri pirotexniki vasitələrlə qarşılayıblar.
