Gəncəçay park-bulvar kompleksi ərazisində yerləşən uşaq əyləncə meydançasında bir sıra problemlər müşahidə olunur.
Gencexeber.az-a daxil olan çoxsaylı şikayətlərə görə, təxminən 10–12 yaşadək uşaqlar üçün nəzərdə tutulmuş yelləncəklər və digər oyun avadanlıqları hazırda yararsız vəziyyətə düşmək üzrədir. Bildirilir ki, buna əsas səbəblərdən biri həmin avadanlıqlardan 15–22 yaş aralığında olan yeniyetmə və gənclərin mütəmadi istifadə etməsidir.
Sakinlər bildirirlər ki, ərazidə yelləncəklərin hansı yaş qrupu üçün nəzərdə tutulduğunu göstərən aydın xəbərdarlıq lövhələri yoxdur. Eyni zamanda, qaydalara əməl olunmasına nəzarət edən məsul əməkdaşların da görünmədiyi qeyd edilir.
Bununla yanaşı, park-bulvar kompleksində təmizliklə bağlı da problemlərin olduğu vurğulanır. İddialara görə, ərazi tum qabıqları, kağızlar, plastik və şüşə qablar, eləcə də digər məişət tullantıları ilə çirkləndirilir.
Vətəndaşlar aidiyyəti qurumlardan uşaq əyləncə meydançasında nəzarətin gücləndirilməsini, yaş məhdudiyyətini göstərən xəbərdarlıq lövhələrinin quraşdırılmasını və mövcud qaydalara əməl olunmasına ciddi nəzarət edilməsini xahiş edirlər.
