Gəncəçay park-bulvar kompleksi (Gəncə bulvarı) ərazisində yaşıllıqların suvarılmasında problem yaranıb.
Sakinlər tərəfindən Gencexeber.az-a verilən məlumata görə, artıq 20 gündən çoxdur ki, bulvar ərazisində yaşıllıqların suvarılması üçün istifadə olunan su kəsilib. Nəticədə ağaclar, kollar və digər bitkilər qurumağa başlayıb.
İddia edilir ki, suyun verilişi Azərbaycan Dövlət Su Ehtiyatları Agentliyi nəzdində fəaliyyət göstərən İri Şəhərlərin Birləşmiş Su Təchizatı Xidmətinin Gəncə Şəhər Sukanal İdarəsi tərəfindən dayandırılıb.
Sakinlərin sözlərinə görə, həmin su xəttindən istifadə edən fərdi yaşayış evlərinin hamısında su sayğacları mövcuddur və abonentlərin borcu yoxdur. Bu səbəbdən onlar suyun borcla əlaqədar kəsilməsi ehtimalını istisna etdiklərini bildirirlər.
Vətəndaşlar məsələ ilə bağlı aidiyyəti qurumların tədbir görməsini istəyirlər. Onlar bildirirlər ki, insanların zəhməti hesabına salınmış yaşıllıqların susuzluqdan məhv olmasının qarşısı təcili alınmalıdır.
