Gəncə Dövlət Universitetinin (GDU) bağlanması ilə bağlı hər hansı müzakirə və ya qərar mövcud deyil.
Bu barədə Gencexeber.az-a adıçəkilən ali təhsil ocağının mətbuat xidməti tərəfindən məlumat verilib. Qeyd olub ki, mediada yayılan fikirlər şəxsi mülahizələrə əsaslanır və ictimai müzakirə predmeti ola bilməz: "Belə iddiaların ictimailəşdirilməsi mövcud hüquqi və inzibati prosedurlara uyğun deyildir".
Bildirilib ki, ölkəmizdə fəaliyyət göstərən bütün ali təhsil müəssisələrinin fəaliyyəti Azərbaycan Respublikası Elm və Təhsil Nazirliyinin Kollegiyasının qərarı əsasında institusional və proqram akkreditasiyasından keçirilir. Bu proses isə ali təhsil müəssisələrinin fəaliyyətinin dövlət təhsil standartlarına, eləcə də mövcud normativ-hüquqi aktların tələblərinə uyğunluğunun qiymətləndirilməsini təmin edir.
"Gəncə Dövlət Universiteti də növbəti mərhələdə institusional akkreditasiyadan keçiriləcək. Təhsildə Keyfiyyət Təminatı Agentliyi tərəfindən yaradılmış komissiya universitet tərəfindən hazırlanmış Özünütəhlil hesabatı əsasında yerində (sahədə) təhlillər aparacaq. Universitet bu prosesə məsuliyyətlə və peşəkar şəkildə hazırlaşıb, qiymətləndirmənin uğurla həyata keçirilməsi üçün bütün zəruri tədbirləri görülüb", - Gəncə Dövlət Universitetinin mətbuat xidmətindən əlavə edilib.
Təhsil ocağı tərəfindən bildirilib ki, Gəncə Dövlət Universiteti qədim tarixə, zəngin elmi ənənələrə və formalaşmış kadr potensialına malik olan, həm fiziki imkanları, həm də təlim-təhsil keyfiyyəti və infrastruktur səviyyəsinə görə ölkənin və regionun ən böyük və köklü ali təhsil müəssisələrindən biridir: "Universitetin əsas məqsədi dövlətin təhsil siyasətinə uyğun olaraq müasir tələblərə cavab verən kadr hazırlığını təmin etmək, elmi-tədqiqat fəaliyyətini genişləndirmək və beynəlxalq akademik əlaqələri möhkəmləndirməkdir".
