Azərbaycan Güləş Federasiyası ölkədə güləşin inkişafını sürətləndirmək və bu sahədə keyfiyyəti artırmaq məqsədilə növbəti layihəyə start verib.
Gencexeber.az-a bu barədə Gəncə - Daşkəsən Regional Gənclər və İdman İdarəsindən məlumat verilib.
Bildirilib ki, noyabrın 5-dən dekabrın 10-dək güləş məşqçiləri üçün ümumrespublika seminarı keçiriləcək. Seminar çərçivəsində milli komandalarda çalışan mütəxəssislər və hakimlər nəzəri və praktiki məşğələlərdə öz təcrübələrini məşqçilərlə bölüşəcək, məşqlərin keçirilməsi, güləş qaydalarının ətraflı izahı və s. mövzuda geniş məlumat verəcəklər. Məqsəd ölkənin müxtəlif bölgələrinin idman məktəblərində, cəmiyyət və təşkilatlarda işləyən güləş məşqçilərinin bilik və bacarığını daha da təkmilləşdirməkdir.
Qeyd olunub ki, Gəncə - Daşkəsən Regional Gənclər və İdman İdarəsinin tabeçiliyində olan güləş məşqçiləri üçün seminar noyabrın 27-də Gəncə şəhərində keçiriləcək.
