“Gəncə Qənnadı” ASC ilə bağlı investisiya müsabiqəsi elan edilib. Bu haqda 20 iyul tarixində Fed.az-a istinadən xəbər veririk.
“Gəncə Qənnadı” ASC-nin dövlətə məxsus və nizamnamə kapitalının 30,03 faizini təşkil edən səhmlərinin satışı üzrə investisiya müsabiqəsi keçirilir. Şəmkir şosesi, 1 ünvanında yerləşən investisiya müsabiqəsində iştirak etmək üçün iddiaçılar investisiya qoyuluşunun istiqamətləri, məbləği və müddəti göstərilməklə ümumi həcmi 400 000 manatdan az olmayan investisiya proqramı təqdim etməlidirlər. Həmçinin yeni iş yerlərinin və istehsal sahələrinin yaradılması, yeni avadanlıq və texnologiyaların tətbiqi, istehsal olunan məhsulların çeşidinin artırılması ilə bağlı konkret təkliflər verilməlidir.
Müəssisənin ümumilikdə 2 401 046 manat həcmində öhdəlikləri var. Müsabiqənin qalibi nəticələr haqqında protokol təsdiq olunduğu tarixdən 30 gün müddətində alqı-satqı müqaviləsini imzalamalıdır. Müqavilədə razılaşdırılacaq müddətdə təklif etdiyi pul vəsaitini (400 000 manatdan az olmamaqla) dövlət büdcəsinə köçürməli, müqavilə ilə müəyyən olunan digər şərt və öhdəlikləri yerinə yetirməlidir.
