Bu gün gəncəlilər üçün əlamətdar gündür. Bu haqda Gencexeber.az 30 dekabr tarixində məlumat verir.
30 dekabr 1989-cu ildə Azərbaycan SSR Ali Sovetinin Fərmanı ilə Kirovabad adı dəyişilərək, şəhərin tarixi adı – Gəncə bərpa olunub. Bu gün həmin tarixdən 33 il keçir.
Dəfələrlə adı dəyişdirilən Nizami yurdunun tarixi adının bərpa edilməsi məsələsini ilk dəfə Əməkdar jurnalist Nüşabə Məmmədli qaldırıb. 1987-ci il fevralın 17-də Bakıda jurnalistlərin VII Qurultayında Rəyasət Heyətində yer alan Məmmədli Kirovabad adının dəyişdirilərək şəhərin tarixi adının bərpa edilməsi ilə bağlı məsələ qaldırır. Onun çıxışı o vaxtkı rəhbərlik tərəfindən xoş qarşılanmasa da, xalq tərəfindən bəyənilir. O, bu çıxışından sonra təqiblərə və təzyiqlərə məruz qalıb.
1990-cı il yanvarın 2-də bu münasibətlə Gəncədə təntənəli iclas keçirilib və xalq şəhərin tarixi adının bərpa edilməsini böyük ruh yüksəkliyi ilə qarşılayıb. Beləliklə, vətənsevər insanların illərlə uğrunda mübarizə apardığı, bu yolda təqiblərə, təzyiqlərə məruz qaldığı bir arzu sonda uğurla nəticələnib.
Qeyd edək ki, 1935-ci ildə Azərbaycan SSR birinci katibi Mir Cəfər Bağırovun göstərişi ilə Gəncə şəhərinin adı Kirovabad adlandırılmışdır.
