İcra Hakimiyyətinin, Gənclər və idman nazirliyinin, Azərbaycan Voleybol Federasiyasının birgə təşkilatçılıqları ilə Gəncə İdman Sarayında ümummilli lider Heydər Əliyevin anadan olmasının 101-ci ildönümünə həsr olunmuş yarış keçirilib. Bu haqda 9 may tarixində İcra Hakimiyyətinə istinadən xəbər veririk.
Respublika Voleybol Turnirinin açılış mərasimi baş tutub. Baletmeyster Sənan Cavadovun rəhbərliyi ilə “Xəmsə” Uşaq Rəqs Ansamblının “Qələbə” rəqsi, Zeynəb Abdullayevanın “Ağlımdan çıxmırsan” və Söhrab İbrahimovun bədii rəhbrəlik etdiyi Uşaq İncəsənət Məktəbinin “Xəmsə” nağaraçalanlar ansamblının ifası tamaşaçılar tərəfindən böyük coşqu ilə qarşılanıb.
Daha sonra Respublika Voleybol Turnirinə start verilib. Yarışda yeniyetmə oğlanlardan ibarət 4 komanda mübarizə aparıb. Federasiya tərəfindən regionlarda təsis edilən Gəncə, Tovuz, Hacıqabul və Oğuz kollektivləri qüvvələrini sınayıb. Birinci görüşdə Gəncə və Hacıqabul komandaları üz-üzə gəlib. Turnirin final oyununda Oğuz və Hacıqabul komandaları qarşılaşıb. Görüşdə Oğuz komandası qələbə qazanaraq, turniri ilk pillədə tamamlayıb. Sonda komandalara diplom, medal, qalib kollektivə isə kubok təqdim ediblər.
