Gəncə Şəhər İcra Hakimiyyətinin başçısı Niyazi Bayramovun işdən azad ediləcəyi haqda yayılan məlumat həqiqəti əks etdirmir. Bu haqda Gəncə Şəhər İcra Hakimiyyətindən məlumat verilib.
Prezident İlham Əliyevin Gəncəyə son səfəri zamanı şəhərin infrastrukturu sahəsində mövcud olan ciddi problemlərinə şahid olması və sonra baş verən iki olay – yol kənarında əkilmiş ağacların ölkə rəhbərinin gedişindən sonra çıxarılması və sahibsiz itlərin işgəncə ilə öldürülüməsi faktları Niyazi Bayramovun guya vəzifəsindən azad olunacağına zəmin yaradıb.
Qurumdan bildirilib ki, hazırda bu məsələ gündəmdə deyil və Niyazi Bayramov işinin başındadır. Əlavə olunub ki, Gəncəçay çayının kənarında əkilən ağacların çıxarılması və sahibsiz küçə heyvanlarının güllələnməsi ilə əlaqədar paylaşılan xəbərlər öz əksinin tapmayıb və tamamilə yalandır.
"Bir daha xatırladırıq ki, sözügedən ağacların əkilməsinin, daha sonra isə çıxarılmasının, iddia edildiyi kimi, Prezident İlham Əliyevin Gəncə şəhərinə səfəri ilə heç bir əlaqəsi yoxdur. Gəncə şəhərində sahibsiz itlərin güllələnərək, məişət tullantıları poliqonuna atılmasını özündə əks etdirən videogörüntülərin Gəncə şəhərinin məişət tullantıları poliqoununda lentə alınması faktı isə öz təsdiqini tapmayıb" - deyə qurumdan bildirilib.
