Gəncə Dövlət Milli Dram Teatrı yeni sosial dram üzərində yaradıcılıq işini yekunlaşdırmaq üzrədir. Bu haqda 11 iyun tarixində Mədəniyyət.az-a istinadən xəbər veririk.
Teatr baş rejissor Prezident mükafatçısı Elşad Əhmədovun quruluşunda türkiyəli yazar Birgül Gülər Yaşıloğlunun “Qadınlar danışarsa” sosial dramını hazırlayıb. Teatrın ədəbi hissə müdiri Anar Ərtoğrul Bürcəliyevin bildirdiyinə görə, yeni tamaşaya yaxın günlərdə ictimai baxış olacaq. O, həmçinin bildirib ki, mədəniyyət nazirinin müvafiq əmrinə əsasən, teatrda yaradılan “İkinci nəfəs” teatr studiyasında da tədris prosesi uğurla davam etdirilir. Studiyaya qəbul edilən gənclər teatrın tarixi ənənələrini öyrənməklə yanaşı, aktyor sənətinin sirlərinə və nəzəri biliklərə yiyələnə bilirlər.
Bundan əlavə, Yaradıcı kollektiv rejissor Tural Mustafayevin quruluşunda hazırlanan E.İoneskonun “Kral ölür” pyesinin tamaşası ilə Portuqaliya və Litvada keçiriləcək iki festivala dəvət alıb. Bir sıra xarici teatrlarla müştərək layihələrin həyata keçirilməsi nəzərdə tutulur. Gəncə Dövlət Milli Dram Teatrının Gürcüstanın Özurgeti Dram Teatrı, Özbəkistanın Kattakurqan vilayəti Dram Teatrı və Rumıniyanın Kraiova Milli Dram Teatrı ilə yaradıcılıq memorandumları mövcuddur.
Bu çərçivədə Özurgeti Dram Teatrının bədii rəhbəri Vasili Çikokidze 2025-ci ilin repertuar planına uyğun olaraq, Gəncə teatrında Nodar Dumbadzenin “Kukaraça” hekayəsinin motivləri əsasında tamaşa hazırlayacaq. Tamaşa hər iki teatrın yaradıcı kollektivi ilə eyni vaxtda oynanılması məqsədilə yaradıcılıq mübadiləsi formasında ərsəyə gələcək. Həmçinin Rumıniyanın paytaxtı Buxarest şəhərinin Milli Dram Teatrının bədii rəhbəri Feliks Aleksa ilə yaradıcılıq məqsədli danışıqlar aparılır.
