Gəncədə hər kəsin "zibil poliqonu" kimi tanıdığı ərazinin təmizlənməsi problemi illərdir öz həllini tapmayıb. Bu haqda Gencexeber.az 22 noyabr tarixində Oxu.az-a istinadən məlumat verir.
Almaniya İnkişaf Bankının dəstəyi ilə məişət tullantılarının idarə edilməsi layihəsi çərçivəsində Gəncədə bərk məişət tullantıları emalı müəssisəsi tikilməli idi. Ekoloqlar inşa edilməyən müəssisənin yaradılmasının vacib olduğunu bildirirlər.
Rəsmi statistikaya görə, Gəncədən gün ərzində 250 tondan çox məişət tullantısı daşınır. Bu məişət tullantıları ancaq basdırılaraq zərərsizləşdirilir.
Məsələ ilə bağlı Gəncə Şəhər İcra Hakimiyyəti Aparatından isə şifahi şəkildə bildirilib ki, müəssisənin tikintisi məsələsi hələlik real görünmür. Bu məsələyə gələcəkdə yenidən baxılacağı istisna edilmir.
