Gəncədə partlayıcı maddələrin istehsalı zavodu fəaliyyət göstərəcək. Bu haqda 9 fevral tarixində Gancapost.info-ya istinadən məlumat veririk.
"AzerGold"un İdarə Heyətinin sədri Zakir İbrahimov mətbuat konfransında bildirib ki, "AzerBlast" MMC ("AzerGold" QSC-nin törəmə cəmiyyəti) 2022-ci ilin sentyabrında Gəncədə sənaye əhəmiyyətli partlayıcı maddələrin istehsalı zavodunu istismara verməyi planlaşdırır.
MMC istehsal etdiyi məhsulların xarici bazarlara çıxarılması, ölkəmizin ixrac potensialının artırılmasına töhfə vermək üçün qabaqcıl innovativ texnologiyaların tətbiqi ilə sənaye partlayıcılarının istehsalını həyata keçirəcək zavod inşa edir.
Qeyd edək ki, "AzerBlast" MMC 9 mart 2021-ci il tarixində dövlət qeydiyyatına alınıb. Şirkətin yaradılmasında məqsəd mədənlərin hasilatı prosesində və digər sənaye sahələrində istifadə olunan mülki partlayıcı maddələrə daxili tələbatın ödənilməsi, idxaldan asılılığın aradan qaldırılmasıdır.
