Gəncədə namizədlərə təklif olunan vakansiya əmək bazarının vəziyyəti ilə bağlı bəzi suallar yaradıb.
Bir neçə gün bundan əvvəl şəhər ərazisində fəaliyyət göstərən divar kağızı (oboy) mağazalarından birinin sahibi Gencexeber.az-a müraciət edərək, onlarda yaranmış vakant yerlə bağlı elan verməyimizi xahiş edib.
Elanda nə təklif olunan əmək haqqı, nə də ki, iş saatları əmək məcəlləsinin tələblərinə uyğun gəlmirdi. Mövzunun aktuallığını nəzərə alaraq məsələni araşdırdıq.
Sahibkar 300 manat maaş müqabilində işçiyə ayda cəmi bir istirahət günü ayırır. Nəzərə alsaq ki, Azərbaycanda həftəlik iş saatı normativi 40 saat, minimum əməkhaqqı isə 345 manatdır, bu da o deməkdir ki, sözügedən şəxs əmək məcəlləsinin tələblərini ciddi şəkildə pozub.
Qarşı tərəfə elanı paylaşmayacağımızla bağlı irad bildirdikdə isə o özünə bəraət qazandıraraq, bunu şəhərdə ümumi qəbul edilmiş təcrübə ilə əsaslandırıb. Bildirib ki, təkcə o deyil, Gəncədə digər sahibkarlar da işçini bənzər şərtlərlə çalışdırırlar:
“Guya tək bizdədir ki? Çox yerdə elədi. Hətta səhər saat 9-dan gecəyə kimi işlədirlər. 300 manat yaxud bir az artıq, ayda da bir dəfə istirahət günü verirlər. İstirahət günləri dövlət işlərinə aiddir. Mağazalarda belə olur”.
Məsələ ilə bağlı Gəncənin digər mağazalarında da araşdırma apardıq. Məlum oldu ki, burada fəaliyyət göstərən turizm, eləcə də geyim, kosmetika və ətir mağazalarında oxşar hallar mövcuddur. Belə ki, əmək haqqları 200-400 arasında dəyişən işçilərə cəmi bir gün istirahət verilir. Düzdür, həftədə bir istirahə günü cədvəli ayda bir istirahət günü qədər ağır olmasa da, sözügedən vəziyyət hər bir halda əmək məcəlləsinə ziddir.
Gəncədə apardığımız araşdırma, qanunvericiliklə müəyyən edilmiş qaydada işçilərin əmək hüquqlarının əməl olunmasının vacibliyini önə çıxarır.
