Gəncə şəhərində yerləşən Abbas Səhhət adına xəstəxanada qəribə hadisə baş verib. Bu haqda Gencexeber.az 4 yanvar tarixində Bizim.media-ya istinadən məlumat verir.
Normal hamiləlik dövrü keçirən qadına həkim tərəfindən erkən qeysəriyyə əməliyyatı təyin edilib. 11-18 yanvar arası uşağın dünyaya gələcəyi gözlənilsə də, əməliyyat dekabrın 29-u olub.
Əməliyyatdan sonra körpə reanimasiyada kuveizə yerləşdirilib. Yanvarın 2-dən sonra vəziyyəti ağırlaşan körpə K.Fərəcova adına Elmi-Tədqiqat Pediatriya İnstitutuna yerləşdirilib.
Məsələ ictimaiyyələşəndən sonra sözügedən xəstəxananın həkimləri səhlənkarlıqda günahlandırılıblar. Yayılan məlumata görə, şöbə rəisi əməliyyatı bayram günlərində Bakıda olacağına görə vaxtından tez keçirib.
Məsələ ilə bağlı Tibbi Ərazi Bölmələrinin İdarəetmə Birliyi (TƏBİB) bildirib ki, Gəncə şəhər sakini Qurbanova Aytən Adil qızı 29 dekabr 38 həftəlik hamiləlik və uşaqlıqda ağır çapıq şikayətləri ilə Abbas Səhhət adına xəstəxanaya müraciət edib. Həkim-ginekoloq Səbinə Quliyeva zərurət olduğundan hamilə qadına keysəriyyə əməliyyatı keçirib. 3 200 qr çəkisi olan uşaq dünyaya gəlib. Əməliyyat fəsadsız keçib. Uşağa bütün zəruri tədbirlər görülüb və o müalicəsini davam etdirmək üçün Elmi-Tədqiqat Pediatriya İnstitutuna təxliyə edilib.
