Bu gecə Gəncə Dövlət Universitetinin Təsviri incəsənət kafedrasının baş müəllimi, rəssam Əbülfət Məhərrəmov 64 yaşında dünyasını dəyişib.
Gencexeber.az-ın məlumatına əsasən, sənətkar uzun müddətdir xərçəng xəstəliyindən əziyyət çəkib. Mərhum bu gün "İmamzadə" Dini Kompleksinin ətrafında yerləşən qəbiristanlıqda torpağa tapşırılacaq.
Qeyd edək ki, Əbülfət Məhərrəmov 1961-ci ildə Gəncədə anadan olub. Uşaqlıqdan rəssamlığa böyük maraq göstərən sənətkar ovaxtkı Məhsəti Gəncəvi adına pedaqoji texnikumun rəsm və rəsmxət fakültəsində təhsil alıb. Texnikumu fərqlənmə diplomu ilə bitirdikdən sonra təhsilini Bakıda, o dövrdə Lenin adına Pedaqoji İnstitutda davam etdirib.
Əbülfət Məhərrəmov 36 il Gəncə Dövlət Universitetində çalışıb. O, həmçinin Azərbaycan Rəssamlar İttifaqının üzvü olub.
Rəssam Mir Cəlal Paşayevin "Bir gəncin manifesti" romanına illüstrasiya çəkmiş, həmin divarüstü əsər hazırda yazıçının adını daşıyan 39 nömrəli məktəbin muzeyində saxlanılır. Muzeyin açılış mərasimində isə yazıçının oğlu Arif Paşayev də iştirak etmişdir.
Allah rəhmət eləsin.
