Gəncə sakinləri Fikrət Əmirov parkında, bitkilərin, xüsusilə də şam ağaclarının quruması və bunun yarada biləcəyi təhlükə ilə bağlı narahatlıqlarını dilə gətirirlər.
Gencexeber.az-a daxil olan şikayətlərə görə, təxminən 3 kilometr uzunluğunda olan istirahət guşəsinin yalnız bir hissəsi mütəmadi suvarılır və yaşıllığını qoruyub saxlayır. Parkın digər hissəsində isə ağaclar, xüsusilə şam ağacları yay aylarında suvarılmadığı üçün qurumağa başlayıb.
Vətəndaşlar qeyd edirlər ki, qurumuş ağaclar güclü külək zamanı aşaraq parkda istirahət edən insanların həyatı üçün təhlükə yarada bilər.
Onlar aidiyyəti qurumlara müraciət edərək parkda baxış keçirilməsini, qurumuş ağaclarla bağlı müvafiq tədbirlərin görülməsini və bütün ərazinin suvarılmasının təmin edilməsini xahiş edirlər.
