Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Pənah Ələkbərlinin (soyadı şərtidir) cinayət işi üzrə məhkəmə iclası başa çatıb.
Məhkəmənin hökmü ilə cəzasını ümumi rejimli cəzaçəkmə müəssisəsində çəkməklə ona 1 il müddətə azadlıqdan məhrumetmə cəzası təyin edilib.
İttihama görə, hadisə ötən il Bərdə rayonunun Kətəlparaq kəndində yerləşən kafelərdən birində baş verib. Belə ki, Pənah Ələkbərli sərxoş vəziyyətdə kafeyə gələrək həyətdə tanışı, zərərçəkmiş Taleh Məcidovla (soyadı şərtidir) görüşüb. Onlar arasında əvvəllər üçüncü şəxsə faizlə verilmiş borc pulun geri qaytarılmaması ilə bağlı mübahisə yaranıb.
Cinayət işinin materiallarına əsasən, zərərçəkmiş şəxs təqsirləndiriləni borcun qaytarılmamasında günahlandırıb, ünvanına nalayiq ifadələr işlədib, daha sonra isə yumruq və təpik vurub. Mübahisənin gərginləşməsi zamanı Pənah üzərində gəzdirdiyi kəsici-deşici alətlə Talehin qarnına zərbə vurub.
Təqsirləndirilən şəxs bildirib ki, hadisədən dərhal sonra ətrafdakı şəxslərə zərərçəkmişi xəstəxanaya aparmağı tapşırıb. O, həmçinin qeyd edib ki, I Qarabağ müharibəsi iştirakçısıdır, bir qolu tam işlək vəziyyətdə deyil. Məhz bu səbəbdən qarşı tərəfin fiziki üstünlüyündən ehtiyat edərək bıçaqdan istifadə etdiyini bildirib.
Pənah törətdiyi əmələ görə peşman olduğunu da məhkəmədə etiraf edib. Zərərçəkmiş isə məhkəmədən Pənaha mümkün olan ən yüngül cəzanın təyin edilməsini xahiş edib.
Mənbə: pravda.аz
