Gəncədə Respublika Fənn Olimpiadasının növbəti mərhələsinə keçənlərin sayı açıqlanıb. Bu haqda 11 yanvar tarixində Gəncə-Daşkəsən Regional Təhsil idarəsinə istinadən məlumat veririk.
8-11-ci sinif şagirdləri arasında ayrı-ayrı fənlər üzrə fənn olimpiadaları təşkil olunur. Elm və Təhsil Nazirliyi ilk (şəhər) mərhələnin nəticələrini açıqlayıb. Bu məlumata əsasən, Gəncə şəhərində təhsil alan 307 şagird olimpiadanın Respublika mərhələsinin yarımfinal turuna vəsiqə qazanıb.
Qeyd edək ki, Respublika Fənn Olimpiadaları riyaziyyat, fizika, kimya, biologiya, Azərbaycan dili və ədəbiyyatı, tarix və coğrafiya olmaqla ümumilikdə 7 fənn üzrə keçirilir. Respublika mərhələsinin yarımfinal turunun qalibləri yerli təşkilat komitələri, final turunun qalibləri isə respublika təşkilat komitəsi tərəfindən diplom, tərifnamə, qiymətli hədiyyələr ilə təltif olunurlar.
