Gəncənin Eminbəyli küçəsində yolun vəziyyəti əhalinin narazılığına səbəb olub.
Sakinlərin Gencexeber.az-a verdiyi məlumata görə, bu il ərazidə su və kanalizasiya xətlərinin çəkilişi aparıldıqdan sonra yol əvvəlki vəziyyətinə qaytarılmayıb. Qazıntı işləri başa çatsa da, yolun yalnız bəzi hissələrinə yamaq vurulub.
Nəticədə küçədə çoxsaylı çökəkliklər, çuxurlar və nahamar sahələr yaranıb. Sakinlər bildirirlər ki, yolun mövcud vəziyyəti nəqliyyat vasitələrinin hərəkətini çətinləşdirir, avtomobillərə ziyan vurur və vətəndaşlar üçün təhlükə yaradır. Xüsusilə yağışlı havalarda çuxurların su ilə dolması onların görünməsini çətinləşdirir və qəza riskini artırır.
Qeyd edək ki, Eminbəyli küçəsi Nizami Gəncəvi prospekti ilə Təbriz küçəsini birləşdirən əsas yollardan biridir və şəhərin iki mühüm ərazisi arasında nəqliyyat əlaqəsinin təmin olunmasında vacib rol oynayır.
Sakinlər aidiyyəti qurumlardan yolun tam şəkildə bərpa olunmasını və problemin qısa müddətdə aradan qaldırılmasını xahiş edirlər.
