Gəncə Ağır Cinayətlər Məhkəməsində xuliqanlıq niyyəti ilə qəsdən adam öldürməyə cəhddə və xuliqanlıqda təqsirləndirilən Samir Daşdəmirovun (soyadı şərtidir) cinayət işi üzrə məhkəmə istintaqı başa çatıb.
Pravda.аz xəbər verir ki, hakim Mikayıl Məmmədzadənin sədrliyi ilə keçirilən prosesdə hökm oxunub.
İttihama görə, Samir Daşdəmirov ilə əvvəllər dostluq münasibətlərində olmuş zərərçəkmiş Rüstəm Əlizadə (ad-soyadı şərtidir) arasında hadisədən bir neçə gün əvvəl mübahisə yaranıb.
Rüstəmin onu təhqir etməsi təqsirləndirilən şəxsdə narazılıq yaradıb və zərərçəkmişdən qisas almaq məqsədilə onu öldürmək qərarına gəlib.
Samir həmin niyyətini həyata keçirmək üçün yaşadığı Gədəbəy rayonunun Qurudərə kəndində zərərçəkmiş şəxsi mübahisəyə cəlb etmək və öz niyyətini həyata keçirmək üçün müxtəlif qıcıqlandırıcı hərəkətlər edib.
Samir Rüstəmi öldürmək məqsədilə ona bıçaqla zərbələr endirib.
Məhkəmə istintaqı zamanı dindirilən Samir Daşdəmirov ona Cinayət Məcəlləsinin müxtəlif maddələri ilə verilmiş ittiham üzrə özünü təqsirli bilmədiyini deyib.
Məhkəmədə verdiyi ifadədə o, Rüstəmi qəsdən öldürmək niyyətində olmadığını, hadisənin qarşılıqlı mübahisə və yaranmış gərgin vəziyyət fonunda baş verdiyini bildirib.
Məhkəmənin hökmü ilə o, cəzasını ciddi rejimli cəza çəkmə müəssisəsində çəkməklə 8 il 6 ay müddətə azadlıqdan məhrum edilib.
