Fizika, riyaziyyat və informatika təmayüllü liseyin (FRİTL) yerləşdiyi ərazidə təhlükəli parklanma ilə bağlı şikayətlər səngimir.
Gencexeber.az-a müraciət edən onlarla sakinin sözlərinə görə, Şah İsmayıl Xətai prospekti ilə Elbrus Allahverdiyev küçəsinin kəsişməsində ("Dəyirman dairəsi") çoxsaylı yük avtomobilləri qanunla qadağan edilmiş ərazidə park olunur.
Şikayətçilər iddia edir ki, prospekt istiqamətindən sürətlə gələn nəqliyyat vasitələrini vaxtında görmək mümkün deyil. Bu isə həmin nöqtədə dəfələrlə xəsarətlə nəticələnən yol-nəqliyyat hadisələrinin baş verməsinə səbəb olub.
Əlavə edilib ki, qeyd olunan ərazidə yük avtomobillərinin dayanması müvafiq yol nişanı ilə qadağan edilsə də, sürücülər buna məhəl qoymur:
"Bu vəziyyət uzun illərdir davam edir. Demək olar ki, hər gün yük maşınları orada saxlayır. Qadağan nişanı olsa da, əməl edən yoxdur. Buna görə də həmin kəsişmədə tez-tez qəzalar baş verir" – şikayət edən sürücülərdən biri qeyd edib.
