Gəncədə "Avropa şəhərciyi" tədbiri çərçivəsində tanınmış ifaçıların iştirakı ilə pulsuz konsert keçiriləcək.
Gencexeber.az məlumat verir ki, iyunun 6-da Gəncə Şəhər İcra Hakimiyyətinin qarşısında yerləşən Heydər Əliyev adına Mərkəzi Meydanda "Avropa şəhərciyi" adlı genişmiqyaslı tədbir təşkil olunacaq.
Tədbirdə Avropa İttifaqına üzv 20-yə yaxın ölkənin stendləri qurulacaq. Burada Avropa dəyərləri, mədəniyyəti və adət-ənənələri nümayiş etdiriləcək.
Gün ərzində ziyarətçilər üçün səhnə proqramları, intellektual və hərəkətli yarışlar, oyunlar, sürpriz hədiyyələr, həmçinin uşaqlar üçün xüsusi əyləncə zonaları təqdim olunacaq.
Tədbirin sonunda isə Çingiz Mustafayev və "Darvish Band" qrupunun iştirakı ilə musiqili konsert proqramı keçiriləcək.
Girişi tam sərbəst olan tədbir saat 12:00-da başlayacaq və təxminən 21:00-dək davam edəcək.
