Gəncə şəhərinin Üzeyir Hacıbəyov küçəsində xoşagəlməz vəziyyət müşahidə olunur.
Gencexeber.az-ın məlumatına görə, 34 nömrəli tam orta məktəbin yaxınlığında avtomobil yolunun hərəkət hissəsinin dörd müxtəlif nöqtəsi məişət tullantıları ilə çirklənib. Ərazidə yerləşən zibil konteynerlərinin içi boş olsa da, onların ətrafına məişət tullantıları atılıb.
Bundan əlavə, küçədə toplanaraq qalaqlanmış ağac yarpaqları da uzun müddətdir ərazidən götürülməyib. Nəticədə yolun hərəkət hissəsində xoşagəlməz mənzərə yaranıb.
Sakinlər bildirirlər ki, ərazinin təmizlənməsi və tullantıların vaxtında daşınması həm sanitar vəziyyətin yaxşılaşdırılması, həm də şəhərin ümumi görünüşünün qorunması baxımından vacibdir. Onlar aidiyyəti qurumlardan problemin qısa müddətdə aradan qaldırılmasını xahiş edirlər.
