Xəbər verdiyimiz kimi, Gəncə şəhərinin Cavad Rəfibəyli küçəsi, 2 ünvanında, həmçinin Sadıllı qəsəbəsinin İmran Qasımov küçəsi və qəsəbənin mərkəzi yollarından hesab olunan Bilal Qəhrəmanov küçəsində yaşayan sakinlər ciddi problemlə üz-üzə qalıblar. Söhbət mövcud asfalt örtüyünün qazılmasından sonra asfaltın bərpa olunmamasından gedir.
Gencexeber.az-a Gəncə Şəhər İcra Hakimiyyəti (ŞİH) tərəfindən verilən məlumata görə, hazırda Gəncə şəhərində "Açıq Kommunal İnfrastruktur Proqramı II" layihəsi icra olunur. Sözügedən layihə çərçivəsində şəhərin içməli su və çirkab su xətləri yenilənir. Bununla əlaqədar olaraq şəhərin bir çox ərazisində qazıntı işləri aparılır. Layihənin icrası tam yekunlaşmış ərazilərdə isə küçə, prospekt, məhəllə və qəsəbədaxili yolların asfaltlanması mərhələli şəkildə, əvvəlcədən müəyyən olunmuş illik plana uyğun həyata keçirilir.
"Məlumat üçün bildiririk ki, cari il ərzində Azərbaycan Avtomobil Yolları Dövlət Agentliyi (AAYDA) və Gəncə Şəhər İcra Hakimiyyəti tərəfindən şəhərin müxtəlif ərazilərini əhatə edən 130-a yaxın küçə və prospekt yenidən asfaltlanmışdır. Cari il ərzində asfaltlanan küçə və prospektlərdən 40-dan çoxu, o cümlədən Cavad bəy Rəfibəyli küçəsi ictimai nəqliyyatın hərəkət marşrutuna daxil olan ərazilərdir. Sözügedən küçə və prospektlər AYNA-nın sifarişi ilə AAYDA tərəfindən asfaltlanıb. Cavad bəy Rəfibəyli küçəsi və döngələrində "Açıq Kommunal İnfrastruktur Proqramı II" layihəsi çərçivəsində işləri tam başa çatıb. Burada (C.Rəfibəyli küç., 2 ünvanında) döngələrin asfaltlanması isə növbəti il üçün nəzərdə tutulub.
Bununla bağlı vətəndaşların aldadılmasından söhbət gedə bilməz. Bir daha vurğulayırıq ki, "Açıq Kommunal İnfrastruktur Proqramı II" layihəsinin icrası tam yekunlaşan ərazilərdə küçə, prospekt, məhəllə və qəsəbədaxili yolların asfaltlanması mərhələli şəkildə və təsdiqlənmiş illik plana uyğun olaraq həyata keçirilir" " – Gəncə Şəhər İcra Hakimiyyətindən bildirilib.
Sadıllı qəsəbəsinin İmran Qasımov küçəsi və qəsəbənin mərkəzi yollarından hesab olunan Bilal Qəhrəmanov küçələrində mövcud vəziyyətlə bağlı əlavə edilib ki, növbəti ildə asfaltlanması nəzərdə tutulan küçələrlə bağlı ictimaiyyətə əlavə məlumat veriləcək.
