Bu gün şair, tərcüməçi, 1934-cü ildən Azərbaycan Yazıçılar Birliyinin üzvü, Azərbaycan SSR xalq şairəsi (1981), Azərbaycan SSR əməkdar mədəniyyət işçisi (1967) Nigar Rəfibəylinin doğum günüdür.
Gencexeber.az məlumat verir ki, Nigar Xudadat qızı Rəfibəyli 23 iyun 1913-cü ildə Gəncədə anadan olub. 1930-cu ildə Bakı Pedaqoji Texnikumunu bitirdikdən sonra Fəhlə-gənclər məktəbində, 1932-1936-cı illərdə isə Moskva Pedaqoji İnstitutunda təhsil alıb. Öncə Bakı kinostudiyasında ssenari şöbəsində tərcüməçi və redaktor, 1937-1939-cu illərdə isə "Uşaqgəncnəşr"də Bədii ədəbiyyat şöbəsində redaktor vəzifələrində işləyib.
O, ədəbiyyata 1928-ci ildə "Dan ulduzu" jurnalında dərc etdirdiyi "Çadra" şeiri ilə gəlib. Daha sonra, 1934-cü ildə Nigar xanımın şeirlər kitabı nəşr olunub.
Şairənin bir çox şeirlərinə musiqi bəstələnib, tanınmış müğənnilər tərəfindən səsləndirilib. Həyat yoldaşı Rəsul Rzaya həsr etdiyi və Akif İslamzadənin ifasında filmotekamızın qızıl fonduna daxil olmuş "Alagözlüm" mahnısı bu gün də hamının sevərək dinlədiyi ən gözəl əsərlərdən biridir.
Məhsəti Gəncəvinin rübailəri, Evripidin "İfigeniya", Fridrix Şillerin "Məkr və məhəbbət", Anton Pavloviç Çexovun "Vanya dayı", "Albalı bağı" dramları, E.L.Voyniçin "Ovod", O.Qonçarın "Bayraqdarlar" romanları, Əlişir Nəvai, Aleksandr Puşkin, Mixail Lermontov, Taras Şevçenko, Ş.Petöfi, A.Mitskeviç, A.Sereteli və başqalarının əsərləri məhz Nigar xanım Rəfibəylinin tərcüməsində Azərbaycan oxucularına təqdim olunub.
Nigar Rəfibəyli 9 iyul 1981-ci ildə dünyasını dəyişib. O, Bakıda II Fəxri xiyabanda dəfn edilib.
