Bu gün Azərbaycan musiqi sənətinin görkəmli nümayəndəsi, Xalq artisti Şahnaz Haşımovanın doğum günüdür.
Gencexeber.az məlumat verir ki, 1957-ci ilin 2 iyun tarixində Kirovabad (indiki Gəncə) şəhərində anadan olan sənətkar bu gün 68 yaşını qeyd edir. Musiqiçi zəngin yaradıcılığı, muğam və xalq musiqisinin inkişafındakı xidmətləri ilə tanınır. O, 1975-ci ildən etibarən Gəncə Dövlət Filarmoniyasının nəzdində fəaliyyət göstərən "Göy-Göl" Dövlət Mahnı və Rəqs Ansamblının solistidir. 1997–2016-cı illərdə isə Gəncə Dövlət Filarmoniyasına rəhbərlik edib. Hal-hazırda Gəncə Musiqi Kollecində xanəndə müəllimi kimi çalışır.
Şahnaz Haşımova həm də ictimai fəaliyyətlə məşğuldur. O, Yeni Azərbaycan Partiyasının üzvü, şəhər təşkilatının siyasi şurasının üzvü, Azərbaycan Ziyalılar Cəmiyyətinin fəxri üzvüdür. Onun repertuarı genişdir – xalq mahnılarından tutmuş muğam, ritmik muğamlar, bəstəkar mahnıları və müxtəlif xalqlara aid əsərlər ifa edib. İfa etdiyi mahnılardan 100-dən çoxu Azərbaycan Televiziyasının "Qızıl Fondu"nda qorunur.
Sənətkar "Azərbaycan SSR əməkdar artisti" (1989), "Azərbaycan Respublikasının xalq artisti" (2000) fəxri adlarına, Azərbaycan Respublikası Prezidentinin fərdi təqaüdünə (2016) və bir sıra mükafatlara layiq görülüb. O, eyni zamanda "Mən dərdimi mahnılara danışdım", "Vətən, sən güman yerimsən" və "Qar dənələri" adlı kitabların müəllifidir.
Şahnaz Haşımova musiqi yaradıcılığı ilə yanaşı, Azərbaycan mədəniyyətinin təbliğində, gənc istedadların yetişdirilməsində və ölkənin musiqi həyatında mühüm rol oynamaqda davam edir.
Gencexeber.az kollektivi olaraq Şahnaz Haşımovanı doğum günü münasibətilə təbrik edir, ona möhkəm can sağlığı və yaradıcılığında uğurları arzulayırıq.
