Bu gün sakinlər Super Ayı müşahidə edə biləcəklər. Bu haqda 19 avqust tarixində Şamaxı Astrofizika rəsədxanasına istinadən xəbər veririk.
Nəsrəddin Tusi adına Şamaxı Astrofizika rəsədxanasının məlumatına əsasən, ilin ilk Super Ay hadisəsi bu gecə, avqustun 19-u saat 22:26-da baş verəcək.
Sözügedən hadisə zamanı Ay 14 faiz böyük və 30 faiz parlaq görünür. Ay 19:41-də doğacaq və səhər saatlarınadək görünəcək.
Budəfəki Super Ay Mavi Super Ay adlanır. Alimlərin sözlərinə görə, ayın mavi çalarda görünməsi çox nadir hallarda vulkan püskürməsi zamanı yaranmış toz səbəbli baş verə bilər. Hal-hazırda isə simvolik olaraq fəsli və aylıq Super Ayı ifadə etmək üçün istifadə olunur.
Qeyd edək ki, ilin sonunadək 18 sentyabr, 17 oktyabr və 15 noyabrda daha 3 Super Ay müşahidə ediləcək.
