Biçindən sonra əkin sahələrinin yandırılması qadağandır.
Kənd Təsərrüfatı Nazirliyi (KTN) fermerlərə və məhsul istehsalçılarına müraciət edərək taxıl sahələrinin biçindən sonra yandırılmasının yolverilməz olduğunu bildirib.
Nazirlik qeyd edib ki, əkin sahələrinin yandırılması həm ekoloji, həm də aqrotexniki baxımdan ciddi fəsadlar yaradır. Bildirilib ki, yanğınlar əkinəyararlı torpaqlarla yanaşı meşələri, meşəmühafizə zolaqlarını və yaşayış məntəqələrini də əhatə edərək ciddi ekoloji problemlərə səbəb olur.
KTN həmçinin bildirib ki, bitki qalıqlarının yandırılması zərərvericilərlə mübarizədə effektiv üsul deyil. Çünki zərərvericilər torpağın dərin qatlarında sağ qala bildiyi halda, faydalı həşəratlar yanğın nəticəsində məhv olur.
Nazirlik xatırladıb ki, "Torpaqların münbitliyi haqqında" Azərbaycan Respublikası Qanununun 9-cu maddəsinə əsasən məhsulu biçilmiş əkin sahələrinin yandırılması qadağandır.
İnzibati Xətalar Məcəlləsinin 244-1-ci maddəsinə əsasən bu qaydanı pozan fiziki şəxslər 400 manatdan 600 manatadək, vəzifəli şəxslər 1 500 manatdan 2 000 manatadək, hüquqi şəxslər isə 5 000 manatdan 6 000 manatadək cərimə edilir.
Mənbə: trend.аz
