Azərbaycan Yerüstü Nəqliyyat Agentliyi (AYNA) tərəfindən sərnişindaşıma sahəsində rəqabətli mühitin formalaşdırılması, marşrutların təhkim edilməsində qanunvericiliyin tələblərinin təmin olunması istiqamətində həyata keçirilən tədbirlər çərçivəsində daha bir neçə şəhərətrafı və şəhərlərarası avtobus marşrutu üzrə keçirilən müsabiqələrin qalibləri müəyyənləşdirilib.
Gencexeber.az-a AYNA-dan bildirilib ki, müsabiqələrin nəticələrinə əsasən, Gəncə–Gədəbəy marşrutu üzrə İbrahimov Nizami Abbasəli oğlu, Mingəçevir–Gəncə marşrutu üzrə isə Qaffarov Murad Abbas oğlu müsabiqənin qalibləri olublar.
Qeyd edilib ki, müsabiqələr "Avtomobil nəqliyyatı haqqında" Azərbaycan Respublikasının Qanununa, eləcə də Nazirlər Kabinetinin 2009-cu il 3 aprel tarixli 52 nömrəli Qərarı ilə təsdiq edilmiş "Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası"na uyğun təşkil edilir.
