Goranboyda Ermənistan silahlı qüvvələri tərəfindən dinc azərbaycanlılara qarşı törədilmiş qətliamın 32-ci ildönümüdür.
Tarixdə Ballıqaya qətliamı kimi yad edilən faciə 1992-ci ilin avqustun 28-də, səhər saat 5 radələrində rayonun Ballıqaya kəndində baş verib.
1992-ci ilin may ayının 18-dən sonra işğal edilmiş Laçın rayonundan olan məcburi köçkünlər Göygöl rayonu ərazisində, Murovdağın ətəklərində məskunlaşdılar. Həmin ilin avqust ayının son günlərində isə sözügedən ailələr məskunlaşdıqları ərazilərin heyvandarlıq üçün əlverişsiz olduğundan Goranboy rayonunun Ballıqaya kəndinə köçdülər.
Məskunlaşdıqdan üç gün sonra səhər saat 5 radələrində Ermənistan silahlı qüvvələrinin yaratdığı diversiya qrupunun 10-12 nəfər üzvü məcburi köçkünlərin yaşadığı ərazini xüsusi amansızlıqla, iri çaplı silahlardan və qumbaraatanlardan atəşə tutub. Atəş nəticəsində aralarında 6 azyaşlı uşaq, o cümlədən 6 aylıq körpə və 93 yaşlı ahıl qadın da olmaqla, 24 nəfər mülki şəxs qətlə yetirilib. Qətliam nəticəsində 3 azyaşlı uşaq hər iki valideynini itirib.
Qeyd edək ki, Ballıqaya qətliamı Ermənistan silahlı qüvvələrinin bundan əvvəl Xocavəndin Qaradağlı kəndində, Xocalı şəhərində, Kəlbəcərin Ağdaban kəndində Qarabağın azərbaycanlı əhalisini məhv etmək məqsədi ilə törədilən kütləvi qırğın aktlarından biridir.
