Gəncədə son günlər sürücülər şəhərdaxili hərəkətdə ciddi problemlərlə üzləşiblər. Bakıda müşahidə olunan tıxac mənzərələri artıq şəhərimizdə də gündəlik hal almağa başlayıb.
Gencexeber.az-ın məlumatına görə, sürücülər tıxacların əsas səbəblərini şəhərdaxili yol hərəkəti sxemində edilən dəyişikliklərdə görürlər. Onların sözlərinə görə, bəzi avtomobil yollarının istiqaməti dəyişdirilib, bu isə nəqliyyatın hərəkətini çətinləşdirib.
Digər bir səbəb kimi isə avtobuslar üçün ayrıca zolaqların ayrılması göstərilir. Əksər sürücülər hesab edirlər ki, bu zolaqlar küçələrin ümumi hərəkət hissəsini daraldaraq sıxlığı artırır.
Müzakirə olunan əsas məsələlərdən biri də Tağı Arani küçəsində çəkilən velosiped zolağı ilə bağlıdır. Velosipedçilər üçün təhlükəsiz hərəkət şəraiti yaradılsa da, sürücülər bunu əlavə sıxlığa səbəb olan amillərdən biri kimi qiymətləndirirlər.
Abadlıq-quruculuq işlərindən sonra gözlənilən rahatlıq əksinə, tıxac problemini daha da kəskinləşdirib. Vətəndaşlar aidiyyəti qurumlardan bu məsələyə təcili olaraq yenidən baxılmasını tələb edirlər.
