Səhlənkarlıq səbəbindən azyaşlının ölümündə təqsirləndirilən Göygöl Rayon Mərkəzi Xəstəxanasının həkim-pediatrı Əmirxan Mövlayevin cinayət işi üzrə məhkəmə prosesi başa çatıb.
Gencexeber.az-ın məlumatına görə, hakim Rəşad Mustafayevin sədrliyi ilə keçirilən prosesdə hökm elan edilib.
İttiham materiallarına görə, hadisə ötən ilin iyun ayında baş verib. İttihama görə, rayon sakini Türkan adlı qadın qızdırması 39.5 dərəcəyə qalxan körpəsini tibbi yardım göstərilməsi məqsədilə Göygöl Rayon Mərkəzi Xəstəxanasının pediatriya (uşaq) şöbəsinə gətirib. Həmin vaxt növbədə olan həkim-pediatr Əmirxan Mövlayevin uşağın hərarətinin normadan artıq olduğunu müəyyən etməsinə baxmayaraq, lazımi diqqət və ehtiyatlılıq göstərməyib.
Mərhum uşağın anası Türkan xanımın məhkəmədəki ifadəsinə görə, pediatr övladını müayinə etdikdən sonra düzgün diaqnoz qoya bilməyib. Yalnız temperaturunu normaya salmaq üçün tibb bacısına iynə vurmağı tapşırıb və dərmanlar yazıb. Qeyd olunan dərmanları uşaq qəbul etdikdən sonra qaytarmağa başlayıb və vəziyyəti daha da pisləşib. Həkimin laqeydliyi azyaşlının ölümü ilə nəticələnib.
Təqsirləndirilən həkim Əmirxan Mövlayev səsləndirilənlərin hamısını gülünc adlandırıb və özünü təqsirli bilməyib. Göygöl Rayon Məhkəməsinin qərarı ilə Əmirxan Mövlayev Cinayət Məcəlləsinin 142.4-cü maddəsi ilə nəzərdə tutulan cinayət əməlinin törədilməsində təqsirli bilinib.
Ona bir il tibb sahəsində müəyyən vəzifə tutma hüququndan məhrum edilməklə iki il müddətinə azadlıqdan məhrumetmə cəzası təyin edilib. Həkimin cəzası bir il sınaq müddəti müəyyən edilməklə şərti hesab olunub.
Fidan İlqar
