Bu gün Azərbaycan milli mətbuatının yaranmasına töhfə verən, maarifçi Zərdabinin yaratdığı “Əkinçi” qəzetinin yaranmasından 149 il ötür. 1875-ci ilin 22 iyulunda yaradılan qəzet azərbaycanlıların ilk mətbu orqanı olub. İllər sonra isə Gəncənin ilk qəzeti olan “Gəncənin səsi” çap edilməyə başladı. Bu qəzet, həmçinin ölkənin ilk region qəzeti olub.
Qəzet 5 may 1920-ci ildə “Qırmızı Gəncə” adı ilə fəaliyyətini davam etdirir. Mətbu orqanının adı 7 dəfə dəyişdirilib. Daha sonra qəzet “Zərbə”, “Kirovabad bolşeviki”, “Kirovabad fəhləsi”, “Gəncə kommunisti” (Gəncə vilayət mərkəzi olduğu zaman qəzet qısa bir müddətdə bu adla çıxıb), “Kirovabad kommunisti”, 1990-cı ildən “Gəncənin səsi” adı ilə oxuculara təqdim olunub. Qəzet, həmçinin dəfələrlə əlifbasını da dəyişib: “Qırmızı Gəncə” ərəb, “Zərbə” latın, “Kirovabad bolşeviki” kiril, “Gəncənin səsi” yenidən latın əlifbası ilə çıxıb.
Milli mətbuatımızın ən uzunömürlü mətbu orqanlarından olan “Gəncənin səsi” qəzetinin Azərbaycan mətbuatının tarixində xidmətləri olub. “Gəncənin səsi” şəhərin inkişafını, ictimai, iqtisadi və mədəni həyatını işıqlandıran və onu tanıdan mətbu orqanı olub. Qəzet təkcə Gəncənin deyil, ümumilikdə bütün Qərb bölgəsinin bütün ictimai-siyasi və mədəni həyatını səhifələrində əks etdirib.
“Qırmızı Gəncə”nin redaktorları, ziyalılar Məmmədkazım Ələkbərli, Balabəy Həsənbəyov, qəzetin məsul katibi Cəfər Bağır milli-mənəvi dəyərlərə sahib çıxdıqları üçün “xalq düşməni” damğası ilə repressiya qurbanı olublar. Buna baxmayaraq, qəzetin redaktorları həmişə həqiqəti yazmağa çalışıblar. Bütün respublika qəzetləri susdurulan zaman sovet qoşunlarının Azərbaycanda törətdikləri 20 Yanvar faciəsini əks etdirən fotoşəkilləri və həqiqətləri ilk günlərdə insanlara çatdıranlar arasında “Gəncənin səsi” qəzeti də var idi.
Bu gün “Gəncənin səsi” milli maarifçilik ideyalarına, inkişafa və tərəqqiyə xidmət edən, nəsildən nəslə qalan salnamələr yazan mətbuat orqanı kimi nüfuz qazana bilib.
Mənbələr:
