Azərbaycan Texnologiya Universitetinin (ATU) tələbəsi Abdurrahim Camalzadə dünya üzrə 140 milyondan çox istifadəçisi olan "Open edX" platformasında kritik təhlükəsizlik zəifliyi aşkarlayıb.
Gencexeber.az ATU-ya istinadən məlumat verir ki, aşkarlanan boşluq beynəlxalq təhlükəsizlik reyestrində CVE-2026-53636 kodu ilə qeydiyyata alınıb. Zəiflik müvafiq təhlükəsizlik prosedurlarına uyğun şəkildə platforma komandalarına təqdim edilib, təsdiqlənərək aradan qaldırılıb.
Aşkarlanan problem həmçinin "GitHub Security Advisory" bazasında təsdiq olunub və təhlükəsizlik yeniləmələri çərçivəsində həll edilib.
Bu uğurlu fəaliyyəti nəticəsində Abdurrahim Camalzadə beynəlxalq kibertəhlükəsizlik ekosistemində "Reporter" statusu əldə edib.
Qeyd edək ki, "Open edX" platforması "Harvard University və Massachusetts Institute of Technology" tərəfindən yaradılıb və dünyanın müxtəlif ölkələrində milyonlarla istifadəçiyə onlayn təhsil xidmətləri təqdim edir.
