Gəncədə təhsil müəssisəsi yeni əməkdaşlığa başlayır. Bu haqda 4 avqust tarixində ATU-ya istinadən məlumat veririk.
Azərbaycan Texnologiya Universiteti (ATU), İnnovasiya və Rəqəmsal İnkişaf Agentliyi və "Huawei Technologies” Azərbaycan şirkəti arasında üçtərəfli görüş keçirilib. Tədbir ATU-da baş tutub. Görüşdə İnnovasiya və Rəqəmsal İnkişaf Agentliyini departament rəhbərləri Fatimə Ələkbərova, Loukas Tzitzis, layihə rəhbəri Gülnar Mirhüseynova, kommunikasiya və tədbirlər üzrə menecer Aygün Məmmədli, "Huawei Technologies” Azərbaycan şirkətini isə ictimaiyyətlə əlaqələr üzrə menecer Kang Jia və insan resursları üzrə aparıcı mütəxəssis Veronika İbrahimova təmsil ediblər.
Burada birgə əməkdaşlıq məsələlərinin mövcud vəziyyəti və görüləcək işlər müzakirə edilib, ATU-da qurulacaq laboratoriya haqqında danışılıb. Sonda "Huawei” şirkəti ilə ATU arasında əməkdaşlıq memorandumu imzalanıb.
Sənəddə Rəqəmsal Bilik və İKT Bacarıqları Proqramının hazırlanması istiqamətində birgə görüləcək işlər, ATU-nun "Huawei” İKT Akademiyasının üzvü olması, İKT sahəsində əmək bazarının tələblərinə uyğun kadrların yetişdirilməsi kimi məsələlər öz əksini tapıb.
