Gəncə şəhərində 48 yaşlı Sabir 2003-cü il təvəllüdlü qızı Süsəni (adlar şərtidir) öldürüb.
Belə ki, Sabir yaşadıqları evdə qızı Süsənin mobil telefonunda keçmiş əri Sərxanla sevgi münasibətləri zəminində yazışmalarını görüb.
Cəzalandırmaq məqsədilə onu təpiklə, yumruqla, şillə ilə, eləcə də mobil telefonla vurub. Müxtəlif dərəcəli bədən xəsarətləri alan Süsən bir gün sonra vəfat edib.
İstintaq orqanı tərəfindən Sabirin barəsində Cinayət Məcəlləsinin qəsdən adam öldürmə maddəsi ilə ittiham elan edilib.
Sabir ittiham üzrə özünü təqsirli bilməyib və bildirib ki, qətl hadisəsindən bir gün əvvəl qızının telefonu gizlətdiyini görüb.
"Qızım Sərxanla ailə həyatı qurub, Moskva şəhərinə gəlin köçmüşdü. Üç ay sonra ondan hicabını açmasını istədilər. Eləcə də, hamilə vəziyyətdə Gəncə şəhərinə evə yola saldılar. Qızıma bir daha onlarla əlaqə saxlamamağı tapşırdım. İki il sonra qızımın telefonuna baxanda keçmiş həyat yoldaşı ilə yazışmalarını gördüm. Onu döydüm, əlimlə üzünə və bədəninə 5-6 zərbə vurdum", - təqsirkar bildirib.
Sabirin ifadəsinə görə, növbəti gün qızının narahatlığını görüb və ona yaxınlaşaraq həkimə getməyi və ya təcili tibbi yardımın çağrılmasını təklif edib.
"Amma o özünü yaxşı hiss etdiyini dedi. Günortadan sonra vəziyyətinin yenidən ağırlaşdığını gördüm və dərhal ailə üzvlərimlə birlikdə təcili tibbi yardıma zəng etdik. Sonra isə qızımın ölümünə şahidi olduq", - deyə Sabir bildirib.
İşə Gəncə Ağır Cinayətlər Məhkəməsində baxılıb. Cinayət Məcəlləsinin 62-ci maddəsi tətbiq edilməklə ona 4 il müddətə azadlıqdan məhrumetmə cəzası təyin edilib və cəzanı ümumi rejimdə çəkməsi müəyyən olunub.
Mənbə: teleqraf.аz
