Ali Məhkəmə Goranboy Dövlət Aqrar İnkişaf Mərkəzinin direktoru Ziyad Əhmədovu qətlə yetirməkdə təqsirləndirilən həmin mərkəzin sabiq baş mühasibi Mirhadı Bağırov barədə qərar verib.
Gencexeber.az Report-a istinadən xəbər verir ki, hakim Əziz Seyidovun sədrliyi ilə keçirilən məhkəmə iclasında Mirhadı Bağırovun hökmdən verdiyi kassasiya şikayəti təmin edilməyib. O, Gəncə Ağır Cinayətlər Məhkəməsinin hökmü ilə 10 il 6 ay müddətinə azadlıqdan məhrum olunub.
Xatırladaq ki, hadisə 2021-ci ilin oktyabrında Goranboy rayonu ərazisində yerləşən Dövlət Aqrar İnkişaf Mərkəzinin binasında baş verib. Mərkəzin baş mühasibi 1992-ci il təvəllüdlü M.Bağırov şəxsi münasibətlər zəminində aralarında yaranmış mübahisə zamanı həmin Mərkəzin direktoru 1964-cü il təvəllüdlü Ziyad Əhmədova bıçaqla xəsarət yetirərək qətlə yetirib.
O, Cinayət Məcəlləsinin 120.1-ci (qəsdən adam öldürmə) maddəsi ilə ittiham edilib.
Mirhadı Bağırovun atası Mirtağı Bağırovun polis polkovnik-leytenantı olduğu bildirilir. Məlumata görə, müttəhimin atası uzun müddət Goranboy Rayon Polis Şöbəsinin rəis müavini vəzifəsində çalışıb, bir müddət rəis vəzifəsini də icra edib.
