Şəmkir rayonunda 21 yaşlı oğlan anasına xəsarət yetirib.
Demokrat.аz xəbər verir ki, hadisə rayonun Yeni Həyat kəndində baş verib. 2005-ci il təvəllüdlü Turan yaşadıqları evdə anası Zəminə ilə mübahisə edib.
Aralarında baş vermiş mübahisə zamanı o, dəmir sini ilə anasının sifət nahiyəsindən vuraraq ona xəsarətlər yetirib.
Turan ifadəsində göstərib ki, məlum hadisə günü saat 20 radələrində evlərində olarkən anası ilə mübahisələri olub:
"Mübahisəyə səbəb anamın ölmüş anası barədə nalayiq ifadə işlətməyim oldu. Buna görə aramızda mübahisə yarandı. Mən də əsəbiləşərək stolun üstündəki dəmir sini ilə onun sifət nahiyəsinə vurdum. Hazırda əməlimdən peşmanam. Anam ilə barışmaq istəyirəm".
Məhkəmənin hökmü ilə təqsirləndirilən şəxs Cinayət Məcəlləsinin 128-ci maddəsi ilə təqsirli bilinib, 240 saat ictimai işlər cəzası alıb.
