Gəncədə təhsil alan tələbələr Almaniyaya yollanacaq.
Gencexeber.az Gəncə Dövlət Universitetinə istinadən məlumat verir ki, təhsil ocağının Xarici dillər fakültəsinin Alman dili müəllimliyi ixtisasının 5 tələbəsi - Mədinə Abbaslı, Səbinə Qurbanova, Aysel Məmmədova, Jalə Qasımova və Elanə Daşdıyeva Alman Akademik Mübadilə Xidmətinin (DAAD) təqaüd proqramına qəbul üçün keçirilən müsabiqədə uğur qazanıblar.
Tələbələr mübadilə proqramı çərçivəsində bir ay müddətində Almaniyada təşkil ediləcək yay məktəblərində təcrübə keçmək şansı əldə ediblər.
Qeyd edək ki, Alman Akademik Mübadilə Xidməti – DAAD tələbə və elmi işçilərin beynəlxalq mübadiləsi ilə məşğul olan dünyanın ən böyük təqaüd təşkilatıdır. Təqaüdlər Almaniya dövləti tərəfindən tam maliyyələşdirilir.
