Gəncədə sexlərin birində yoxlama keçirilib. Bu haqda 5 avqust tarixində Azərbaycan Respublikasının Qida Təhlükəsizliyi Agentliyinə istinadən xəbər veririk.
Söhbət fiziki şəxs Balakişi Mürsəl oğlu Verdiyevə məxsus alkoqolsuz içkilərin istehsalı sexindən gedir. Burada agentlik əməkdaşları tərəfindən planlı yoxlama keçirilib. Nəticədə müəssisədə sanitariya norma və qaydalarının, gigiyena normativlərinin, qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb.
Müəssisədə istehsal edilən alkoqolsuz içkilərin digər istehsalçı şirkətlərə məxsus şüşə butulkalarda qablaşdırıldığı və məhsulların etiketlənməsi zamanı qanunvericiliyin tələblərinə riayət edilmədiyi məlum olub. Həmçinin burada döşəmə və divarların təmirsiz olduğu, anbar sahəsinin mövcud olmadığı, butulkaların doldurulma sahəsində soyuducu və metal kranların paslandığı və çirklənmə riski yaratdığı, yuma çanağının, istifadə olunan masa və digər avadanlıqların asan təmizlənə bilən və dezinfeksiya işlərinin aparılmasına imkan verən korroziyaya davamlı materialdan təşkil olunmadığı, obyektin isti su ilə təmin edilmədiyi, işçi heyətin dövri tibbi müayinələrə cəlb olunmadığı və xüsusi geyimlə təmin edilmədiyi müəyyən edilib.
Faktlarla bağlı sahibkar barəsində inzibati qaydada tədbir görülüb. Sexin fəaliyyəti məhdudlaşdırılıb və icrası məcburi göstərişlər verilib.
