Gəncədə Dövlət Vergi Xidməti tərəfindən 100 min manatdan çox dəyərdə aksiz markasız tütün məmulatları aşkar olunub. Bu haqda 10 iyun tarixində Report-a isinadən xəbər veririk.
Vergi Cinayətlərinin İbtidai Araşdırılması Baş İdarəsi, 12 saylı Ərazi Vergilər Baş idarəsi və Baş Polis İdarəsinin əməkdaşlarının iştirakı ilə məhkəmə qərarları əsasında və operativ vergi nəzarəti tədbirləri çərçivəsində nəzarət tədbirləri keçirilib. Nəticədə qeyri-qanuni olaraq külli miqdarda aksiz markası ilə markalanmamış məhsulların satışının aparılması və satış məqsədilə saxlanması faktları aşkar edilib.
Heydərov Rüstəm Qasım oğluna məxsus Kəpəz rayonunun Müseyib Bağırov küçəsi, ev 35 yaşayış ünvanında 865,7 min ədəd, Əliyev Şahin Qulu oğluna məxsus M.A.Abbaszadə küçəsi, 20/6 ünvanda yerləşən ərzaq mağazasında 313,2 min ədəd və Nizami rayonunun Ə.Babayev küçəsi, ev 32 yaşayış ünvanında 588,4 min ədəd olmaqla ümumi dəyəri 100 min manatdan yuxarı olan 1 767 360 ədəd aksiz markasız tütün məmulatı aşkar edilərək protokol əsasında götürülüb.
Hazırda faktlarla bağlı Dövlət Vergi Xidməti araşdırmalar aparır.
